Chapter 1: “The Haunted Library”

Ek student ek purani library dhundta hai jis me aisi kitaab hoti hai jo parhny walay ko apne andar khinch leti hai.

 Shahid apne doston ke sath school se niklta hai aur faisla karta hai ke aaj us purani library ke andar jaye ga jo saloon se band hai. Uske dost janay se inkaar kar dete hain aur use akela chor kar ghar ke liye nikal jate hain. Shahid faisla karta hai ke woh akela hi us library me jaye ga aur pata lagaye ga ke aakhir udhar hai kya…

Woh us sunsan gali me pohnchta hai jahan par woh library hoti hai. Wahan na koi aadmi hota hai na koi ghar… us gali me sirf andhera hota hai. Woh library ke darwazay ke paas pohnchta hai to us par tala laga hota hai. Woh apne bag se pen nikalta hai aur tala kholne ki koshish karta hai. Woh jese hi pen andar dalta hai, tala apne aap khud ba khud khul jata hai. Woh yeh dekh kar thora heran hota hai lekin nazar andaaz kar deta hai.

Woh aahista aahista qadam barhata hai aur library ke andar jata hai. Halki si roshni ek khidki se aa rahi hoti hai jo sirf ek hi kitaab par parh rahi hoti hai, baqi har taraf andhera hota hai. Shahid ghabrata hua us kitaab ki janib barhta hai jaise ke woh kitaab usko bula rahi ho… Woh us kitaab ke paas pohnchta hai, uske haath khud bakhud us kitaab ko uthanay ke liye uth jate hain.

“Andheron ki Pukar” kitaab ka naam dekh kar Shahid thora sa ghabra jata hai lekin himmat se faisla karta hai ke isay zaroor parhe ga. Woh jese hi kitaab kholta hai to usme ek purana ghar aur ek library bani hoti hai…

Shahid safha palat’ta hai to baqi saare safhe khaali hotay hain. Woh faisla karta hai ke yahan se wapis chala jaye, jese hi woh janay ke liye apne qadam barhata hai library buri tarah hilnay lagti hai aur dekhte hi dekhte Shahid ko woh kitaab apne andar khinch leti hai…

Shahid zor se akar zameen par girta hai aur uski nazar samne parti hai to wahi ghar aur ek purani library hoti hai

. Woh uthta hai aur bhagnay lagta hai par library aur ghar ke ilawa woh udhar se nikal nahin pata, mano ke jaise har cheez usko dhakka de kar peeche kar rahi ho… Shahid ko samajh aajati hai ke woh kitaab me hai.

Woh us ghar me janay ka faisla karta hai, ghar ke andar dakhil hota hai… uske pairon se zameen nikal jati hai, hilti hui kursiyan, urtay huay lafz aur phati purani aapas me baatein karti hui kitaabein.

 Achanak koi cheez uske sar par akar lagti hai aur Shahid behoosh ho jata hai…

Halki halki awaazain kaanon me sunai deti hain, aankh khulti hai to samne ek ladka jiska naam Ahmed aur ek larki jiska naam Zoya hota hai, kharay hotay hain… Shahid hilne ki koshish karta hai lekin uske haath paon kursi se bandhay hotay hain…

“Yahan par kesay aaye ho aur kyun aaye ho?” Ahmed aur Zoya sawal karte hain.
“Humein yahan se bahar niklnay ka rasta batao, warna chhodenge nahi…”

Shahid halki awaaz me kehta hai: “Mujhe nahi pata, main bhi yahan se nikalna chahta hoon! Tum yahan kesay aaye aur kyun?”

Ahmed aur Zoya sawal karte hain: “Main ek kitaab se aaya hoon aur mujhe nahi pata kesay…” Ahmed aur Zoya ko yakeen aajata hai aur woh Shahid ke haath khol dete hain.

“Humein yahan kitna arsa ho gaya hai hum nahi jaante, yahan na time badalta hai aur na hi din aur raat badalti hai…” dono dukh ke sath bolte hain.

Itne me hi ek siren bajta hai aur awaaz aati hai: “3 Players Added! GAME START!”
 

👉 Agay kya hoga? Shahid, Ahmed aur Zoya ke sath… aur aisi kaunsi game hai jo 3 logon ke hone se start hogi?
Kya Shahid, Ahmed aur Zoya nikal payenge us kitaab se?

Janne ke liye mere sath jure rahiye Chapter 2 ke liye.
Main hoon aapki dost DAY DREAMER 🌸